TELOnews.com

தேசிய தொழிற்துறை மன்றங்களின் சம்மேளனத்தினால் வருடந்தோறும் நடத்தப்படும் இலங்கைத் தொழில் முயற்சியாளர் விருது வழங்கும் நிகழ்வில், வடமாகாண முயற்சியாளர்களின் 2008ஆம் ஆண்டுக்கான விருது வழங்கும் வைபவம் நேற்று (10, நவ)பிற்பகல் 3.00 மணியளவில் யாழ். வீரசிங்கம் மண்டபத்தில் நடைபெற்றது.

இவ்விருது வழங்கும் நிகழ்வில் வடமாகாணத்தைச் சேர்ந்த ஐந்து முயற்சியாளர்கள் அவர்களின் முயற்சியாண்மைக்காகக் கௌரவிக்கப்பட்டனர். மூவருக்கு சான்றிதழ்களும், இருவருக்கு விருதுகளும் வழங்கப்பட்டன.

நிகழ்வில் முதன்நிலை விருது யாழ்ப்பாணம் ராஜா கிறீம் ஹவுஸ் அதிபர் சி.சத்தியசீலனுக்கும், இரண்டாவது விருது யாழ்ப்பாணம் வெஸ்ரா இண்டஸ்றீஸ் அதிபர் க.சுந்தரலிங்கத்திற்கும் வழங்கப்பட்டன.

சான்றிதழ்கள் யாழ்ப்பாணம் பாமினி கட்டிட ஒப்பந்தக்காரர் இ.பாலசுந்தரம், வவுனியா கோபிதன் காமன்ஸ் அதிபர் திருமதி கோ.அசோக்குமார், வவுனியா உதயன்ஸ் வேளாண் மற்றும் நீர்ப்பாசன அதிபர் க.உதயகுமார் ஆகியோருக்கு வழங்கப்பட்டன.

வருடந்தோறும் மாகாண, தேசிய ரீதியாக நடைபெறும் இந்நிகழ்வில் ISO 9001:200 தர விருதுகளைப் பெற்ற இலங்கை வர்த்தக தொழிற்துறை மன்றங்களின் நிறுவனமே மேற்படி விருதுகளை வழங்குகின்றது.

விருதுகளுக்காகத் தெரிவு செய்யப்படும் நிறுவனங்களில், விற்பனைப் புரள்வு விகிதம், இலாப விகிதம், ஊழியர் நலன் மீதான அக்கறை, அரசாங்க சட்டங்களை பின்பற்றுதல், தொழில் முயற்சி நிறுவனத்தின் கணக்காய்வாளர் அறிக்கை, குறித்த வருடத்திற்கான வருடாந்த ஆண்டறிக்கை, புதிய உற்பத்திகள் மற்றும் சேவைகளை மேம்படுத்தும் ஆற்றல், சமூகப்பொறுப்பு, சந்தையில் நிற்கக் கூடிய ஆற்றல், வாடிக்கையாளர் நலன் மற்றும் சக போட்டியாளர்களுடன் போட்டியிடும் திறமை போன்ற விடயங்கள் பிரதானமாகக் கவனத்தில் எடுக்கப்பட்டன.

இவ்விருது வழங்கும் நிகழ்வில் பிரதம விருந்தினராக வடமாகாண ஆளுநர் ஜி.ஏ.சந்திரசிறி கலந்து கொள்ளவிருந்த போதும் அவர் கொழும்பு சென்றமையினால் பிரதம விருந்தினராக யாழ்.மாநகரசபை ஆணையாளர் மு.செ.சரவணபவன் கலந்து கொண்டார்.

அத்துடன் இலங்கை வர்த்தக தொழிற்துறை சம்மேளனப் பணிப்பாளர் எஸ்.ரி.எஸ்.அருளானந்தன், யாழ்.வர்த்தக கைத்தொழில் மன்றங்களின் தலைவர் கே.பூரணச்சந்திரன், தேசிய கைத்தொழிற்துறை சம்மேளனத்தின் இணைப்பாளர் டபிள்யு.ஜே. சூசைரட்ணம், வர்த்தக சம்மேளனப் பணிப்பாளர் கோகில விக்கிரமநாயக்க ஆகியோரும் விருந்தினர்களாகக் கலந்து கொண்டனர்.

You can leave a response, or trackback from your own site.