TELOnews.com

லண்டனில் இருந்து கட்டுநாயக்க விமான நிலையத்தை நோக்கிப் பயணித்த ஸ்ரீலங்கன் ஏர்லைன்ஸ் விமானத்திலிருந்த அலுவலக உதவியாளர் ஒருவரின் கைப்பையை திருடிய கணக்காளர் கட்டுநாயக்க விமான நிலையத்தில் வைத்து விமான நிலைய பொலிஸாரால் நேற்று (26) கைது செய்யப்பட்டுள்ளார்.

கைது செய்யப்பட்டவர் கனடாவில் கணக்காளராகக் கடமையாற்றும் யாழ்ப்பாணம் பிரதேசத்தைச் சேர்ந்த 60 வயதுடையவர் ஆவார்.14 இலட்சத்து 23 ஆயிரம் ரூபா பெறுமதியான 2,700 பவுண் நகைகள் மற்றும் 04 கையடக்கத் தொலைபேசிகள் அடங்கிய கைப்பையே இவ்வாறு திருடப்பட்டுள்ளது.

இது தொடர்பில் தெரியவருவதாவது,
இங்கிலாந்தில் அலுவலக உதவியாளராகக் கடமையாற்றும் கொழும்பு பன்னிபிட்டிய பிரதேசத்தைச் சேர்ந்த 55 வயதுடைய நபரொருவர் லண்டனில் இருந்து கட்டுநாயக்க விமான நிலையத்தை நோக்கி ஸ்ரீலங்கன் ஏர்லைன்ஸ் விமானத்தில் பயணித்துக் கொண்டிருந்த போது தனது கைப்பை திருடப்பட்டுள்ளதை அவதானித்துள்ளார்.

பாதிக்கப்பட்டவர் இது தொடர்பில் ஸ்ரீலங்கன் ஏர்லைன்ஸ் விமானச் சேவையின் அதிகாரிகளிடம் முறைப்பாடு அளித்துள்ளார்.

இதனையடுத்து ஸ்ரீலங்கன் ஏர்லைன்ஸ் விமானச் சேவையின் அதிகாரிகள் இது தொடர்பில் கட்டுநாயக்க விமான நிலைய பொலிஸாரிடம் தெரிவித்துள்ளார்.

பின்னர் இந்த விமானம் கட்டுநாயக்க விமான நிலையத்தை வந்தடைந்ததையடுத்து விமான நிலைய பொலிஸாரால் மேற்கொள்ளப்பட்ட சோதனையில் சந்தேக நபர் கைது செய்யப்பட்டுள்ளார்.

சந்தேக நபரிடமிருந்து திருடப்பட்ட கைப்பையில் இருந்த பொருட்கள் விமான நிலைய பொலிஸாரால் கைப்பற்றப்பட்டுள்ளது.

கைது செய்யப்பட்ட சந்தேக நபர் இன்று (27) நீர்கொழும்பு நீதிமன்றில் ஆஜர்படுத்தப்படவுள்ளார்.

மூலம்/ஆக்கம் : இணையத்தள செய்தி

You can leave a response, or trackback from your own site.