TELOnews.com

மட்டக்களப்பு சித்தாண்டி திகிலிவேட்டைப் பிரதேசத்தில் நேற்றிரவு இரண்டு ஆயுதக் குழுக்களுக்கிடையே நடைபெற்ற துப்பாக்கிச் சண்டையில் 3 பேர் கொல்லப்பட்டனர்.
 
இந்தப் பகுதியில் மறைந்திருந்த தமிழ் மக்கள் விடுதலைப் புலிகள் இயக்க உறுப்பினர்களுக்கும், அந்தப் பகுதியால் வந்த தமிழீழ விடுதலைப் புலிகள் இயக்க உறுப்பினர்களுக்குமிடையிலேயே மோதல் நடைபெற்றிருப்பதாக ஏறாவூர் பொலிசார் தெரிவித்தனர்.

நேற்றுச் சனிக்கிழமை இரவு 8.30 அளவில் நடைபெற்ற இந்த மோதலில், த.ம.வி.பு. இயக்க உறுப்பினர் ஒருவரும், த.வி.பு. இயக்க உறுப்பினர்கள் இருவருமாக 3 பேர் கொல்லப்பட்டிருப்பதாக பொலிசார் கூறினர்.

துப்பாக்கி வெடித்து இராணுவ வீரர் பலி

பனிச்சங்கேணி இராணுவ முகாமில் நேற்றிரவு இராணுவ வீரர் ஒருவரின் துப்பாக்கி தவறுதலாக வெடித்ததில், ஜே.வி.மஞ்சுள (22வயது) என்ற இராணுவ வீரர் உயிரிழந்தார்.

இவரது சடலம் இன்று ஞாயிற்றுக்கிழமை காலை வாழைச்சேனை வைத்தியசாலைக்கு எடுத்துவரப்பட்டு, நீதிபதி மாணிக்கவாசகர் கணேசராசா முன்னியிலையில் விசாரணைகள் நடைபெற்றன.

இவரது சடலத்தை பொலநறுவை வைத்தியசாலைக்கு எடுத்துச்சென்று பிரேத பரிசோதனையை மேற்கொண்டபின்னர், சடலத்தை உறவினர்களிடம் கையளிக்குமாறு நீதிபதி உத்தரவிட்டார்.

பிரேத பரிசோதனை அறிக்கையை வாழைச்சேனை நீதிமன்றத்துக்கு அனுப்பிவைக்குமாறு உத்தரவிட்ட நீதிபதி, 21ம் திகதி இந்த வழக்கு விசாரணைக்கு எடுத்துக்கொள்ளப்படும் என்று தெரிவித்தார்.

You can leave a response, or trackback from your own site.