TELOnews.com

மட்டக்களப்பு,பொலிஸ் நிலையத்துக்கு அருகில் இன்று  காலையில் இடம்பெற்ற கிளேமோர் குண்டு வெடிப்பில் இருவர் கொல்லப்பட்டதுடன் ஒன்பது பேர் காயமடைந்தனர். இச்சம்பவம் இன்று காலை 7.30 மணியளவில் இடம்பெற்றுள்ளது.

மட்டக்களப்பு பொலிஸ் நிலையத்துக்கும் எரிபொருள் நிரப்பு நிலையமொன்றுக்குமிடையில் நிறுத்தி வைக்கப்பட்டிருந்த சைக்கிள் ஒன்றிலேயே இந்தக் கிளேமோர் குண்டு பொருத்தப்பட்டிருந்ததாகப் பொலிசார் தெரிவித்தனர்.

பாடசாலை மாணவர்கள் நால்வர், ஓர் ஆசிரியை, இரு தாதியர், இரு சிவிலியன்கள் ஒரு பொலிஸ் கான்ஸ்டபிள் ஆகியோரே காயமடைந்தவர்களாவர்.

பொலிஸ் சார்ஜன்ட் பிரியந்த (39), சிவிலியனான கணபதிப்பிள்ளை வள்ளிபுரம் (58) ஆகியோரே இச்சம்பவத்தில் கொல்லப்பட்டவர்களாவர்.

காயமடைந்து மட்டக்களப்பு போதனா வைத்தியசாலையில் அனுமதிக்கப்பட்டுள்ளவர்களில் மூவரின் நிலை கவலைக்கிடமாகவிருப்பதாக வைத்தியசாலையின் பணிப்பாளர் டாக்டர் முருகானந்தன் தெரிவித்தார்.

சம்பவ இடத்துக்குச் சென்ற மட்டக்களப்பு மாவட்ட நீதிமன்ற நீதிபதி வி.ராமகலன் மரண விசாரணையை மேற்கொண்டார்.

இதேவேளை, இந்தக் குண்டு வெடிப்பு நிகழ்ந்த பிரதேசத்தினூடான போக்குவரத்துக்குத் தடைவிதிக்கப்பட்டுள்ளது. இந்தப் பகுதியில் அமைந்திருந்த சுமார் 150 கடைகள் மூடப்பட்டுள்ளன.

இந்தப் பிரதேசத்தில் இராணுவத்தினரும் பொலிசாரும் கூட்டுத் தேடுதலில் ஈடுபட்டுள்ளனர்.

You can leave a response, or trackback from your own site.