TELOnews.com

அல்ஜீரியாவில் கடந்த மாதம் 21-ந் தேதி, ஹெர்வ் குர்தல் என்ற பிரான்சு நாட்டவரை தீவிரவாதிகள் கடத்திச் சென்றனர். அங்கு செயல்பட்டு வரும் ‘ஜந்த் அல்-கிலிபா’ அல்லது ‘கலிபாவின் படை வீரர்கள்’ இயக்கத்தை சேர்ந்த தீவிரவாதிகளால் அவர் கடத்தப்பட்டிருக்கலாம் என கூறப்பட்டு வந்த நிலையில், சமீபத்தில் அவரை தீவிரவாதிகள் படுகொலை செய்தனர். இதைத்தொடர்ந்து தீவிரவாதிகளின் மறைவிடங்கள் என கருதப்படும் பகுதிகளில் அல்ஜீரிய ராணுவம் தீவிர தேடுதல் வேட்டை நடத்தியது. இந்த நடவடிக்கையின் போது, போரியா பகுதியில் மறைந்திருந்த 3 தீவிரவாதிகளை ராணுவ வீரர்கள் சுட்டுக்கொன்றனர். அவர்களிடம் இருந்து தானியங்கி ஆயுதங்கள் உள்பட பல்வேறு ஆயுதங்கள் கைப்பற்றப்பட்டன.

மேலும் அங்குள்ள தியாரத் மண்டலத்தில் நேற்றும், நேற்று முன்தினமும் நடந்த தாக்குதல்களில் 2 தீவிரவாதிகள் கொல்லப்பட்டனர். அவர்களிடம் இருந்தும் ஆயுதங்கள் கைப்பற்றப்பட்டன. முன்னதாக ஹெர்வ் குர்தல் கொல்லப்பட்ட இடமாக கருதப்படும், ஜுர்த்ஜுரா மலைப்பகுதியில் அமைந்துள்ள தீவிரவாதிகள் முகாமை ராணுவ வீரர்கள் தாக்கி அழித்தனர். மேலும் அவரை கொலை செய்தவர் உள்பட அந்த சம்பவத்தில் தொடர்புடைய 5 தீவிரவாதிகள் அடையாளம் காணப்பட்டு உள்ளதாகவும், அவர்களை தேடும் பணி நடந்து வருவதாகவும் ராணுவம் தெரிவித்துள்ளது.

You can leave a response, or trackback from your own site.