TELOnews.com

பஞ்சாப் மாநிலம், பதான்கோட் பகுதியில் உள்ள விமானப்படை தளத்துக்குள் புகுந்து பெரும் நாசவேலைக்கு திட்டமிட்ட தீவிரவாதிகளின் முயற்சி நேற்று முறியடிக்கப்பட்டது. தாக்குதலுக்கு வந்த 5 தீவிரவாதிகளும் சுட்டுக்கொல்லப்பட்டனர். பாதுகாப்பு படையினர் 6 பேர் வீரமரணம் அடைந்தனர். அவர்கள் தங்கள் இன்னுயிரை தியாகம் செய்து, விமானப்படை தளத்தை தகர்க்கும் எதிரிகளின் முயற்சியை தவிடு பொடியாக்கினர்.

பதான்கோட் விமானப்படை தளத்தின் அருகாமையில் தீவிரவாதிகள் பதுங்கி இருக்கலாம் என்ற சந்தேகத்தில் அங்கு தேசிய பாதுகாப்பு படையினர் தேடுதல் வேட்டை நடத்தி வந்தனர். இந்நிலையில், இன்று காலை அங்கு மீண்டும் ஒரு குண்டு வெடிப்பு சம்பவம் நிகழ்ந்துள்ளது பெரும் பரபரப்பை ஏற்படுத்தியுள்ளது.

இந்த குண்டு வெடிப்பில் தேசிய பாதுகாப்பு படையை சேர்ந்த கமாண்டோ வீரர் லெப்டினன்ட் கர்னல் நிரஞ்சன் என்பவர் வீர மரணம் அடைந்தார். காயமடைந்த மேலும் மூன்று வீரர்கள் ஆஸ்பத்திரியில் அனுமதிக்கப்பட்டு, சிகிச்சை பெற்று வருகின்றனர். இதையடுத்து, பதான்கோட் விமானப்படை தளத்தை பாதுகாக்க பலியான இந்திய வீரர்களின் எண்ணிக்கை ஏழாக உயர்ந்துள்ளது.

இந்நிலையில், இன்று பிற்பகலில் இருந்து அங்கே துப்பாக்கிச் சண்டை நடைபெற்று வருவதாகவும், அங்கு பதுங்கி இருக்கும் தீவிரவாதிகளுடன் பாதுகாப்பு படையினர் என்கவுன்ட்டரில் ஈடுபட்டுள்ளதாகவும் தகவல்கள் வெளியாகியுள்ளன.

You can leave a response, or trackback from your own site.