TELOnews.com

அனுகுமாரவின் கும்பல் அதிகாரத்தை கைப்பற்றினால் இலங்கையில் இரத்தக்களரி ஏற்படும் என ஆளும் கட்சியின் பிரதான அமைப்பாளரும், நகர அபிவிருத்தி வீடமைப்பு அமைச்சருமான பிரசன்ன ரணதுங்க எச்சரித்துள்ளார்.

நாடு முன்னோக்கி செல்லும் ஒவ்வொரு முறையும் மக்கள் விடுதலை முன்னணி நாட்டை பின்னோக்கி நகர்த்துவதாகவும் அவர் கூறியுள்ளார்.

எனவே, இம்முறை ஜனாதிபதித் தேர்தலில் வாக்களிப்பதில் மிகவும் அவதானமாக இருக்க வேண்டும் எனவும் அவர் வலியுறுத்தியுள்ளார்.

திவுலபிட்டிய, கட்டான பிரதேசத்தில் இடம்பெற்ற மக்கள் சந்திப்பில் கலந்து கொண்டு உரையாற்றிய பிரசன்ன ரணதுங்க,

பொருளாதார நெருக்கடியுடன் இந்த நாட்டில் புதிய அரசியல் கலாசாரம் உருவானது. நாங்கள் எரிபொருள் வரிசைகள், எரிவாயு வரிசைகளில் கஷ்டப்பட்டோம். அந்த காலம் எங்களுக்கு நினைவில் உள்ளது.

ஜனாதிபதியின் வெற்றிக்காக செயற்படுவதால் தற்போது பிரசன்ன ரணதுங்க ஐக்கிய தேசியக் கட்சியில் இணைந்து கொண்டுள்ளதாக சிலர் கூறுகின்றனர். இல்லை. நான் இன்னும் பொதுஜன பெரமுனவில்தான் இருக்கிறேன்.

இன்று மகிந்தவின் மேடையில் வாய்சவடால் விட ஏராளமான வீரர்கள் உள்ளனர். ஆனால் 2015 இல் அவர் தோற்றபோது, அங்கு யாரும் இருக்கவில்லை. அவரை மீண்டும் அரசியலுக்கு கொண்டு வர நான்தான் முன்னின்று செயல்பட்டேன்.

மேல் மாகாண முதலமைச்சர் என்ற வகையில் எனது உத்தியோகபூர்வ இல்லத்தில் கலந்துரையாடல் நடைபெற்றது. எமது தியாகத்தினால் தான் ஜனாதிபதியை நியமித்து பொதுஜன பெரமுன அரசாங்கத்தை அமைக்க முடிந்தது.

மகிந்த ராஜபக்சவால்தான் போர் வெற்றி பெற்றது. கோத்தாபய ராஜபக்ஷ நாட்டையும் மக்களையும் கோவிட் தொற்றுநோயிலிருந்து காப்பாற்றியவர். அந்த கடந்த காலம் எங்களுக்கு நினைவில் உள்ளது. கோட்டாபய ராஜபக்சவின் அரசாங்கத்தால் கோவிட் தொற்றுநோய்க்குப் பின்னர் ஏற்பட்ட பொருளாதார நெருக்கடியை சரியாக நிர்வகிக்க முடியவில்லை. அந்த பலன்களைத் தான் நாங்கள் அனுபவித்தோம்.

பொருளாதாரம் சரிந்த நாட்டை ரணில் விக்கிரமசிங்க மீண்டும் கட்டியெழுப்பியுள்ளார். இந்த ஜனாதிபதித் தேர்தலில் அவரை நாம் ஆதரிக்க வேண்டும். வரலாற்றில் பல நாடுகள் மிகவும் கடுமையான நெருக்கடிகளை சந்தித்துள்ளன. அந்த சமயங்களில் அரசியலை ஒதுக்கி வைத்துவிட்டு நாட்டு நலனுக்காக மக்கள் ஒன்றிணைந்தனர்.

அத்தகைய ஒரு உன்னத நோக்கத்திற்காக நாங்கள் ஒன்றாக இருக்கிறோம். பதவிக்கான சலுகைகளுக்காக நாங்கள் ஜனாதிபதிக்கு உதவவில்லை. அத்தகைய தனிப்பட்ட அரசியல் நிகழ்ச்சி நிரல் எங்களிடம் இல்லை.

நாட்டை கட்டியெழுப்பியதும், பொருளாதாரம் நிலைபெற்றதும் எங்களுக்கு அரசியல் செய்ய முடியும். ஜனாதிபதித் தேர்தலில் போட்டியிடும் ஏனைய வேட்பாளர்களின் கொள்கை அறிக்கைகளைப் பாருங்கள். அதுதான் ஜனாதிபதியின் வேலைத்திட்டம். இந்த நாட்டில் அதிகாரம் நிறைவேற்று ஜனாதிபதிகளிடமே இருந்தது.

ரணில் விக்கிரமசிங்க நிறைவேற்று ஜனாதிபதியாக இருந்ததில்லை. அவர் எப்போதும் இரண்டாவதாகவே இருந்தார். இம்முறை இரண்டு வருடங்கள் நிறைவேற்று அதிகாரம் கொண்ட ஜனாதிபதியாக இருக்கும் வாய்ப்பு அவருக்குக் கிடைத்தது.

நாடு மிகவும் மோசமான நிலையில் இருந்தபோது குறுகிய காலத்தில் தனது சர்வதேச உறவுகளை பயன்படுத்தி நாட்டை கட்டியெழுப்பினார். தொங்கு பாலத்தில் பயணிக்கும் எம்தை காப்பாற்ற அவர் தேவை. அதனால்தான் நாங்கள் ஒன்றாக இணைந்தோம்.

இந்த நாட்டை எப்போதும் பின்னோக்கி கொண்டு சென்றது ஜே.வி.பி தான். 2022 ஆம் ஆண்டு வீடுகளுக்கு தீ வைத்து கொடூரத்தை நாட்டில் விதைத்தது அனுரகுமார திஸாநாயக்கவின் தலைக்கவச கும்பல்தான்.

இவ்வாறானதொரு குழுவிற்கு அதிகாரம் வழங்கப்படுமானால் நாட்டில் மீண்டும் இரத்தக்களரி ஏற்படும். எனவே இம்முறை மிகவும் கவனமாக வாக்களிக்க வேண்டும். தனது 3 சதவீத வாக்குகள் 40-50 சதவீதமாக அதிகரிக்கும் என அனுரகுமார நினைக்கிறார். அது நடக்காது. ஒரு வாக்கை எவ்வளவு கடின உழைப்பை செலுத்த வேண்டும் என அரசியல்வாதிகளாகிய எங்களுக்கு தான் தெரியும்.” என்றார்.

மூலம்/ஆக்கம் : இணையத்தள செய்தி

You can leave a response, or trackback from your own site.