TELOnews.com

ஜனவரி 16 ஆம் திகதி நடிகர் சயீப் அலிகான் மீது கத்திக்குத்து தாக்குதல் நடத்தப்பட்டது. இதில் படுகாயமடைந்த அவர் சிகிச்சைக்குப் பின்னர் வீடு திரும்பினார்.

இந்த கத்திக்குத்துச் சம்பவத்துடன் தொடர்புடைய ஷரிபுல் இஸ்லாம் முகமது அமின் பக்கீர் எனும் மும்பையைச் சேர்ந்த நபரை பொலிஸார் கைது செய்து விசாரணைகளை மேற்கொண்டு வருகின்றனர்.

முதலில் சத்தீஸ்கரைச் சேர்ந்த ஆகாஷ் கைலாஷ் என்பவரையே பொலிஸார் கைது செய்தனர். ஆனால், அவரது அடையாளம் சந்தேக நபருடன் ஒத்துப்போகவில்லை என்பதால் அவர் விடுவிக்கப்பட்டார்.

சந்தேகத்தின் பேரில் தவறுதலாக கைலாஷ் கைது செய்யப்பட்டமையால் வேலை, திருமணம் அனைத்தையும் இழந்துவிட்டதாக தெரிவித்துள்ளார்.

இதுதொடர்பில் அவர் கூறியிருப்பதாவது, “பொலிஸாரின் ஒரு தவறினால் என் வாழ்க்கை நாசமாகிவிட்டது. எனது அடையாளத்தை கவனிக்கத் தவறிவிட்டதால் தற்போது அனைத்தையும் இழந்து நிற்கிறேன்.

இதனால் நீதி கேட்டு நடிகர் அலிகானின் வீட்டுக்கு வெளியில் நிற்க திட்டமிட்டுள்ளேன். நான் கைதானதன் காரணமாக எனது வருங்கால மணப்பெண்ணின் குடும்பத்தார் திருமணப் பேச்சுக்களை தொடர மறுத்துவிட்டனர்” எனக் கூறியுள்ளார்.

இது தொடர்பில் கைலாஷின் பாட்டி கூறுகையில், “பொலிஸார் தவறுதலாக கைலாஷை கைது செய்தமையால் அவரது தொழில் பறிபோய்விட்டது. இதற்காக நாங்கள் அரசிடம் நஷ்டஈடு வழங்க வேண்டும் என கோரிக்கை விடுக்கிறோம்” எனக் கூறியுள்ளார்.

மூலம்/ஆக்கம் : இணையத்தள செய்தி

You can leave a response, or trackback from your own site.