TELOnews.com

ஐ.நா. சபையில் சுகாதாரத்திற்கு, குழந்தைகளுக்கு, தொழிலாளர்களுக்கு என்று ஒவ்வொரு துறை சார்ந்து தனித்தனியாக அமைப்புகள் உண்டு. பெண்களுக்கு? இது வரை இல்லை. அந்தக் குறை நீங்கிவிட்டது. பாலினச் சமத்துவத்தை நோக்கமாகக் கொண்டு ஐ.நா.விற்கான பெண்கள் அமைப்பு தொடங்கப்படுகிறது இந்த அமைப்பை உருவாக்க ஆதரவு தெரிவித்து 192 வாக்குகள் கிடைத்திருக்கின்றன. எந்தவித எதிர்ப்புமின்றி இத்தீர்மானம் நிறைவேறியிருக்கிறது. ‘ஐக்கிய நாடுகள் சபை மகளிர் அமைப்பு’ என்ற பெயரில் இவ்வமைப்பு செயல்படவிருக்கிறது. ஆங்கிலத்தில் ‘UN Women’ என்றழைக்கப்படும். இதற்கான தீர்மானம் ஜூன் 30 அன்று நிறைவேற்றப்பட்டது.

ஏற்கெனவே ஐ.நா.வில் பெண்களின் பிரச்சினைகளுக்காகச் செயல்பட்டு வரும் 4 அமைப்புகள் இப்போது ஒரு குடையின் கீழ் கொண்டு வரப்பட்டுள்ளன. உலகளவில் பெண்களுக்கெதிரான அடக்குமுறைகள் பாரபட்சமின்றி அனைத்து நாடுகளிலும் உள்ளன. இந்நிலையில் அவர்களின் பிரச்சினைகளைச் செவிமடுப்பதற்கான ஒரு களமாக, அமைப்பாக இந்த அமைப்பு சேயல்படும்.

இந்த அமைப்பை ஏற்படுத்துவதற்கான ஒப்புதல் பெற நான்காண்டுகள் தேவைப்பட்டன. இதற்காக ஐரோப்பிய நாடுகளைச் சேர்ந்த மகளிர் அமைப்புகளோடு ஐ.நா. சபையில் உள்ள பிற மகளிர் அமைப்புகள் ஒன்றிணைந்து இப்பணியை மேற்கொண்டன. பெண்களுக்கென்றே உருவாக்கப்பட்டுள்ள இந்த அமைப்பு, பெண்களின் முன்னேற்றத்திற்கு முழுமையாகத் தன்னை அர்ப்பணித்துப் பாடுபடும் என துணைப் பொதுச் செயலர் ஆஷா ரோஸ்மிகிரோ தெரிவித்தார். அவரே இந்த மகளிர் அமைப்பின் தலைமைப் பொறுப்பையும் ஏற்கிறார். வரும் 2011ஆம் ஆண்டு ஜனவரி 1 முதல் இப்புதிய அமைப்பு செயல்படத் துவங்கும் என அறிவிக்கப்பட்டுள்ளது.

பெண்களின் மீதான வன்முறை, ஒடுக்குமுறைகள், குறிப்பாகப் பெண் குழந்தைகளின் மீதான வன்முறை, பாலியல் வன்முறைகள் போன்ற குற்றங்களை ஆய்வு சேது அவற்றைக் குறைப்பதற்கும், அறவே நீக்குவதற்குமான தருணம் வந்து விட்டது என்று மகிழ்கின்றனர் பெண்ணியவாதிகளும், மனித உரிமை ஆர்வலர்களும். இந்த அமைப்பு பல்வேறு நாடுகளில் ஆங்காங்கே, மனித உரிமைகளுக்காகவும், பெண்கள் நலனில் அக்கறை கொண்டும் இயங்கி வரும் அமைப்புகளோடு கைகோர்த்து தனது பணிகளைச் செய்யும் என்று அறிவிக்கப்பட்டுள்ளது.

(நன்றி: புதிய தலைமுறை)

You can leave a response, or trackback from your own site.