TELOnews.com

மாத்தறை, ஊருபொக்க பிரதேசத்தில் வைத்தியர் ஒருவரிடம் ஐந்து இலட்சம் ரூபா கப்பம் பெற முயற்சித்த இருவர் பொலிஸாரின் துப்பாக்கிப் பிரயோகத்தில் காயமடைந்துள்ளனர். இச்சம்பவம் நேற்று முன்தினம் இரவு இடம்பெற்றுள்ளது. இந்தக் கும்பலைச் சேர்ந்த மேலும் இருவர் தப்பியோடியுள்ளதுடன் அவர்கள் வந்த முச்சக்கர வண்டி ஒன்றையும் பொலிஸார் கைப்பற்றியுள்ளதாக பொலிஸ் ஊடகப் பேச்சாளர், சிரேஷ்ட பொலிஸ் அத்தியட்சகர் ரஞ்சித் குணசேகர தெரிவித்தார்.

இந்தச் சம்பவம் தொடர்பாக மேலும் தெரியவருவதாவது, மாத்தறை ஊருபொக்க பிரதேசத்தைச் சேர்ந்த வைத்தி யர் ஒருவரிடம் கொள்ளைக் கும்பல் ஒன்று தொலைபேசி மூலம் மிரட்டி 5 இலட்சம் ரூபா பணத்தை கப்பமாக கோரியுள்ளது. அந்தத் தொகையைத் தருவதாக பொருந்திக் கொண்ட அந்த வைத்தியர் அருகிலுள்ள பொலிஸில் முறைப்பாடு செய்துள்ளார்.

இதனையடுத்து நேற்று முன்தினம் இரவு 10 மணியளவில் பொலிஸார் சிவில் உடையில் அந்த பணத்தை கொள்ளைக் கும்பலிடம் கொடுப்பதற்காகச் சென்றுள்ளனர்.

இதன்போது கொள்ளைக் கும்பலுக்கும் பொலிஸாருக்கும் இடையில் துப்பாக்கிப் பிரயோகம் இடம்பெற்றுள்ளது.

பொலிஸாரின் துப்பாக்கிச் சூட்டில் கொள்ளைக் கும்பலைச் சேர்ந்த இருவர் காயமடைந்துள்ளனர். பின்னர் அவர்களை பொலிஸார் மடக்கிப் பிடித்து மாத்தறை வைத்தியசாலையில் அனுமதித்துள்ளனர்.

இந்தச் சம்பவம் தொடர்பான விசாரணைகளை மாத்தறை பொலிஸார் மேற்கொண்டு வருகின்றனர். தப்பிச் சென்ற கொள்ளைக் கும்பலைச் சேர்ந்த மேலும் இருவரையும் தேடும் பணியில் பொலிஸார் ஈடுபட்டுள்ளதாக பொலிஸ் ஊடகப் பேச்சாளர் மேலும் தெரிவித்தார்.

You can leave a response, or trackback from your own site.