TELOnews.com

ரஷ்யா மற்றும் மத்திய ஆசிய நாடுகளில் ஒரு வாரம் அரசு முறைப்பயணம் மேற்கொள்வதற்காக இன்று புது டெல்லியில் இருந்து தனி விமானம் மூலம் புறப்பட்டு சென்ற பிரதமர் நரேந்திர மோடி உஸ்பெகிஸ்தான் நாட்டின் தலைநகரான தாஷ்கென்ட் நகரை வந்தடைந்தார். விமான நிலையத்தில் அவருக்கு உஸ்பெகிஸ்தான் பிரதமர் ஷவ்கத் மிரோமோனோவிச் மிர்ஸியோயேவ் தலைமையில் சிகப்புக் கம்பள வரவேற்பு அளிக்கப்பட்டது.இங்கிருந்து நாளை கஜகஸ்தான் செல்லும் அவர் 8-ம் தேதி ரஷ்யா சென்றடைகிறார். இந்தியா-ரஷ்யா இடையிலான பொருளாதார, அரசியல் மற்றும் வர்த்தக உறவை வலுப்படுத்தும் முயற்சியில் ரஷ்ய அதிபர் விளாடிமிர் புதினுடன் பேச்சுவார்த்தை நடத்தும் பிரதமர் மோடி, எஸ்.சி.ஓ. மற்றும் பிரிக்ஸ் மாநாட்டிலும் கலந்து கொள்கிறார்.

ரஷ்யாவில் உள்ள உஃபா நகரில் நடைபெறும் இந்த எஸ்.சி.ஓ. மாநாட்டில் கலந்து கொள்வதற்காக பாகிஸ்தான் பிரதமர் நவாஸ் ஷெரிப்பும் ரஷ்யாவுக்கு வருகிறார். இந்த மாநாட்டுக்கு இடையில் நவாஸ் ஷெரிப்புடன் பிரதமர் நரேந்திர மோடி சந்தித்துப் பேசுவாரா? என்பது தொடர்பாக இருவேறு யூகங்கள் நிலவி வருகின்றன.

இந்நிலையில், நவாஸ் ஷெரிப்பும் பிரதமர் நரேந்திர மோடியும் சந்தித்துப் பேசுவதற்கான சாத்தியக்கூறுகள் தென்படுவதாக இந்தியா மற்றும் பாகிஸ்தான் ஊடகங்கள் கருதுகின்றன. ரம்ஜான் நோன்பு தொடங்கியபோது நவாஸ் ஷெரிப்புக்கு பிரதமர் மோடி டெலிபோன் மூலம் வாழ்த்து தெரிவித்தது ஒரு நல்ல ஆரம்பத்தின் முதல்படியாக பார்க்கப்படுகின்றது. இதன் இரண்டாம் படியாக ரஷ்யாவில் நவாஸ் ஷெரிப்பை அவர் சந்தித்து பேசுவார் என டெல்லி வட்டாரங்களும் எதிர்பார்க்கின்றன.

You can leave a response, or trackback from your own site.