TELOnews.com

யூரோ கோப்பை இறுதிப் போட்டியில் பிரான்ஸைத் தோற்கடித்து போர்ச்சுகல் சாம்பியன் ஆகியுள்ளது.பிரான்ஸின் செயின்ட் டெனிஸ் நகரில் ஞாயிற்றுக்கிழமை நள்ளிரவு நடைபெற்ற போட்டியில் பிரான்ஸ் வெல்லும் என்கிற எதிர்பார்ப்பு பலரிடமும் இருந்தது. இவ்விரு அணிகளும் இதுவரை 24 ஆட்டங்களில் நேருக்கு நேர் மோதியுள்ளன. அதில் பிரான்ஸ் 18 வெற்றிகளையும், போர்ச்சுகல் 5 வெற்றிகளையும் பதிவு செய்துள்ளன. ஓர் ஆட்டம் டிராவில் முடிந்துள்ளது. 1975 முதல் தற்போது வரையில் பிரான்ஸுடன் 10 ஆட்டங்களில் மோதியுள்ள போர்ச்சுகல், அவையனைத்திலும் தோற்றுள்ளது. குறிப்பாக ரொனால்டோ இடம்பெற்றிருந்த போர்ச்சுகல் அணி, பிரான்ஸுக்கு எதிராக வெற்றி கண்டதில்லை. இதனால், பிரான்ஸ் அணி மூன்றாவது முறையாக யூரோ கோப்பையை வெல்லும் முனைப்பில் களமிறங்கியது.

அந்த அணி இதற்கு முன்னர் 1984, 2000-ம் ஆண்டுகளில் கோப்பையை வென்றுள்ளது. யூரோ கோப்பை இறுதி ஆட்டத்தில் இதுவரை தோற்றதில்லை என்பதால் இந்த முறையும் கோப்பையை வென்றுவிடலாம் என்ற உற்சாகத்தில் போர்ச்சுகலை சந்தித்தது பிரான்ஸ்.

ஆரம்பம் முதல் இரு அணி வீரர்களும் கோல் அடிப்பதில் மும்முரமாக இருந்தார்கள். இதில், ஒரு பின்னடவைச் சந்தித்தது போர்ச்சுகல். ஆட்டத்தின் 25-வது நிமிடத்தில் காயம் காரணமாக வெளியேறினார் ரொனால்டோ. பிரான்ஸ் அணி கோலடிக்க நிறைய முயற்சிகள் மேற்கொண்டாலும் எதுவும் பலனளிக்கவில்லை.

ஆட்டநேரத்தின் முடிவில் இரு அணிகளும் கோல் அடிக்காததால், வெற்றியைத் தீர்மானிக்க கூடுதல் நேரம் வழங்கப்பட்டது. அதில், 109-வது நிமிடத்தில் போர்ச்சுகலின் ஈடர் கோல் அடித்தார். இறுதியில் 1-0 என்கிற கோல் கணக்கில் வென்று யூரோ கோப்பையைத் தட்டிச் சென்றது போர்ச்சுகல்.

ரொனால்டோ தலைமையிலான போர்ச்சுகல் அணி இதுவரை எந்தவொரு பெரிய போட்டியிலும் வென்றதில்லை என்ற நீண்ட நாள் குறை இந்த வெற்றியின் மூலம் தீர்த்துவைக்கப்பட்டுள்ளது.

You can leave a response, or trackback from your own site.