TELOnews.com

இலங்கைத் திருநாட்டில் வாழும் தமிழ் மக்களுக்கு மட்டுமன்றி புலம்பெயர்ந்து வாழும் எம்மக்களுக்கும் தைப்பொங்கல் நல்வாழ்த்துக்களைத் தெரிவித்துக் கொள்வதில் பெருமகிழ்வெய்துகின்றேன். உழவர் திருநாள், தமிழர் பெருநாள் என்றெல்லாம் பெருமைப்படும் தைத்திருநாளான இன்று தமிழ்கூறும் நல்லுலகம் எங்கும் இத் தைப்பொங்கல் விழா மகிழ்வுடன் கொண்டாடப்படுகின்றது.

இப் பூவுலகில் சூரிய பகவானால் பருவகாலங்கள் உண்டாகின்றன. அவற்றுள் மாரிகாலம் வழங்கும் மழையினால் பயிர்கள் விளைகின்றன. மாரிகால ஆரம்பத்தில் விதைக்கின்ற பயிர் வகைகள் யாவும் மழைவீழ்ச்சிக் காலத்தில் வளர்ந்து, முற்றி தைமாதத்தில் அறுவடை செய்யப்படுகின்றன. அந்த வகையில் எமக்குத் தேவையான உணவுப்பொருட்களை விளைவிக்க உதவிடும் சூரிய பகவானை வரவேற்று தை முதல் நாளில் பூரண கும்பம் வைத்து புதிய அடுப்பில் புதுப் பானை வைத்து புதிதாக அறுவடை செய்த அரிசியில் பாற்பொங்கல் பொங்கிப் படைத்து நன்றிக் கடன் செலுத்தும் திருநாளே, தைப்பொங்கல் திருநாளாகும்.

தைமாதம் பிறக்கும் ஆண்டுத் தொடக்கம் மக்களுக்குப் பல எதிர்பார்ப்புக்களை உருவாக்கும். அந்த வகையில் தமிழரின் எதிர்பார்ப்பாக முன்வைக்கப்படவுள்ள அரசியலமைப்பானது நீண்டகாலமாகத் தீர்க்கப்படாதுள்ள தேசிய இனப்பிரச்சினைக்கு நியாயமானதுமÊ நீடித்து நிலைத்திருக்கக்கூடியதுமான தீர்வினைக் காண வழிகாட்ட வேண்டுமெனவும், அது இலங்கை வரலாற்றில் ஒரு திருப்புமுனையாக அமைந்திட வேண்டுமெனவும், இதய சுத்தியுடனான இன நல்லிணக்கத்தை ஏற்படுத்த வேண்டுமெனவும் இந் நன்னாளில் நாம் நம்பிக்கை கொள்வோம்.

எதிர்பார்ப்புகளும் சவால்களும் நிறைந்த ஆண்டொன்றினுள் காலடி வைத்துள்ள இத்தருணத்தில் இலங்கை வாழ் மக்களிடையே புரிந்துணர்வு, நல்லிணக்கம் ஏற்பட்டு சாந்தி, சமாதானத்துடன் கூடிய சௌபாக்கியமிக்க நாடாக இந்நாடு சிறப்புற, பிறக்கும் தைத்திங்கள் வழிசமைத்திட வேண்டுமென எனது உளம் நிறைந்த நல்வாழ்த்துக்களைத் தெரிவித்துக்கொள்வதோடு எல்லாம் வல்ல இறைவனையும் பிரார்த்திக்கின்றேன்.

இரா.சம்பந்தன், பா.உ.,

எதிர்க்கட்சித் தலைவர்,

இலங்கைப் பாராளுமன்றம்

தமிழ் தேசிய கூட்டமைப்பு

You can leave a response, or trackback from your own site.